?

Log in

No account? Create an account

Previous Entry | Next Entry

Վերջին ամիսներին իրար հետեւից բացվեցին եւ ընտրությունների նախաշեմին հայկական համացանցում միանգամից սկսեցին գործել մի քանի ցանցային ծրագիր՝ նվիրված ընտրական գործընթացներին: Այս անգամ հինգ ցանցային լրատվական ծառայություն բացել են առանձին ընտրական ծրագրեր՝ Lragir (հայերեն), A1+ (հայերեն), Panorama.am (հայերեն), ArmeniaNow (հայերեն եւ անգլերեն), Mediamax (հայերեն, ռուսերեն եւ անգլերեն). Բացի դրանից գործում են եւս երկու ցանցային աղբյուրներ՝ E-Channel (հայերեն եւ անգլերեն), и «Խորհրդարանական ընտրություններ-2007» (հայերեն, ռուսերեն եւ անգլերեն) կայքերը: (Նշենք, որ ըստ կայքում տեղադրված տեղեկատվության, «Խորհրդարանական ընտրություններ-2007» ծրագրի մասնակիցներից մեկը «Իրավունք» շաբաթաթերթն է։)

Ընտրական կայքերը բավականին բազմազան են ոչ միայն տրամադրվող նյութերի առումով, այլ նաեւ տեղեկատվության տեսակի եւ դրա տրամադրման որակի առումով։

Տեղեկատվության առումով կայքերը ներկայանում են որպես անկախ աղբյուրներ։ Միայն «Խորհրդարանական ընտրություններ-2007» կայքը բացահայտ կապվում է մի շարք կազմակերպությունների հետ, որոնց շարքում է «Օրինաց Երկիր» կուսակցությունը։

Եթե Lragir, A1+, Panorama.am, Mediamax, «Խորհրդարանական ընտրություններ-2007» կայքերը հիմնականում շեշտը դնում են լրահոսի վրա, ապա ArmeniaNow եւ E-Channel հիմնականում ներկայացնում են վերլուծություններ, հարցազրույցներ եւ այլն։ E-Channel ամենահարուստն է ընթացիկ նյութերի առումով՝, քանի որ տրամադրում է վիդեոնյութեր, արտատպումներ արտասահմանյան մամուլից, ուսանողական գործեր, ունի զվարճանքի էջեր եւ այլն: Նման բազմազանությունն ակնհայտորեն լայնացնում է կայքի այցելուները շրջանակը՝ համեմատած մյուս կայքերի հետ։

Բացի դրանից, կայքերից մի մասը ներկայացնում է տեղեկատվություն կուսակցությունների, ընտրական տեղամասերի, թեկնածուների մասին։ Նման տեղեկատվություն, բայց տարբեր ծավալով տրամադրում են Lragir, Panorama.am, Mediamax, «Խորհրդարանական ընտրություններ-2007» եւ E-Channel կայքերը։ Օգտվողի համար ամենահեշտ եւ բազմազան տեղեկատվությունը տրամադրում է Panorama.am, որտեղ նույնիսկ ներկայացված են թեկնածուների (որոնք բաշխված են ըստ ընտրատարածքների) մի մասի կենսագրական տվյալները։


Բացի դրանից, A1+, E-Channel եւ Panorama.am կայքերը ունեն RSS ֆիդերի հնարավորությունը, ինչը առաջընթաց է հայկական ցանցային լրատվամիջոցների համար, որոնց մեծամասնությունը այս հնարավորությունը չունի:

Ընտրությունները վերջապես խթանեցին հայկական ցանցում լրատվական բլոգերի ստեղծումը։ Նույն երեք կայքերը բացեցին իրենց սեփական բլոգերը՝ A1+, E-Channel եւ Panorama.am: Սակայն բլոգերի հնարավորություններն ամբողջությամբ դեռ չեն օգտագործվում։ Լրատվամիջոցները կարող էին ցանցային օրագրերի միջոցով գովազդել ինչպես իրենց կայքերը, այնպես էլ՝ լրագրողներին։ Դեռեւս բլոգերը փաստացիորեն մնում են անանուն եւ օգտագործվում են քննարկումներ ծավալելու համար։ Այս խնդիրը նույն հաջողությամբ կարող էին լուծել հասարակ ինտերնետային ֆորումները։

Գալիք ընտրությունները մեծացնում են հետաքրքրությունը Հայաստանի հանդեպ եւ պետք է ակնկալել, որ մոտակա օրերին արտասահմանից կմեծանա այցելությունների հոսքը դեպի հայկական կայքերը։ Նման պարագայում հայկական լրատվական կայքերը կարող են զգալիորեն բարձրացնել իրենց այցելիությունը։ Սակայն, A1+, Panorama.am եւ Lragir գործակալությունների ընտրական ծրագրերը միայն հայերեն են։ Եւ դա այն դեպքում, երբ երկրորդ կամ երրորդ լեզուն ներմուծելը կայքերի թիմերից մեծ ջանքեր չէր պահանջի։ A1+ եւ Panorama.am հիմնական կայքերը առանց այն էլ տրամադրում են եռալեզու տեղեկատվություն, Lragir-ը՝ հայերեն եւ անգլերեն։

Կայքերը, բնականաբար, ունեն բազմաթիվ տեխնիկական խնդիրներ։ Տեխնիկական իրականացման տեսանկյունից ամենազարհուրելիներն են «Խորհրդարանական ընտրություններ-2007» եւ Lragir կայքերը, որոնք բացարձակապես այցելուների պահանջները հաշվի չեն առնում։ (Նշենք, որ երկու կայքերն էլ ստեղծվել են նույն հեղինակի կողմից)։ Այսպես, կայքերը գրեթե հնարավոր չե ընթերցել ուրիշ բրաուզերներով՝ բացառությամբ Internet Explorer-ը։

Գոյություն ունեն խնդիրներ, որոնք բարդեցնում են կայքերի ընթերցումը։ Այսպես, Lragir, «Խորհրդարանական ընտրություններ-2007» եւ A1+ էջերի յուրաքանչյուր նյութի հետ բեռնավորվում է ահռելի քանակի այլ տեղեկատվություն, ինչը զգալիորեն ծանրաբեռնում է բացվող էջը։ Հաշվի առնելով Հայաստանում ինտերնետի հիմնական արագությունները, դայալ–ափից օգտվողների հեռախոսային րոպեավարձը՝ կարելի է ասել, որ տվյալ կայքերը զբաղվում են բնակչության թալանով։ Առավելեւս, որ տրվող տեղեկատվությունը ոչ մի կերպ չի օգնում այցելուին։ Այսպես, եթե E-Channel կամ ArmeniaNow կայքերը էջի վերջում հղումներ են տալիս նմանատիպ նյութերի վրա, ինչը հեշտացնում է այցելուների գործը, A1+–ի մեկ նորության հետ բերվում են տրվում են ոչ թե հղումներ նմանատիպ նորությունների վրա, այլ բեռնավորվում են ամբողջ լրահոսի վեռնագրերը՝ ավելի քան հարյուր վեռնագիր։

Գոյություն ունեն տեխնիկական խնդիրներ, որոնք կարող են նույնիսկ ապատեղեկացնել ընթերցողներին։ Այսպես, Lragir, «Խորհրդարանական ընտրություններ-2007» եւ ArmeniaNow ընտրական կայքերը չեն ցուցադրում օգտվողներին նյութերի տեղադրման ամսաթիվը:

Արդեն կարելի է փաստել, որ գալիք ընտրությունները բավականին լուրջ առաջընթացի բերեցին հայկական ցանցային մամուլի բնագավառում։ Ամենայն հավանականությամբ սպասվող նախագահական ընտրությունները կարող են դառնալ առաջխաղացման հաջորդ փուլը։ Առավելեւս, որ մոտակա ամսիներին վերջնականորեն կլուծվի Հայաստանում ինտերնետի ապամենաշնորհացման հարցը, ինչը կարող է կտրուկ բարձրացնել օգտվողների քանակը։


ՍԱՄՎԵԼ ՄԱՐՏԻՐՈՍՅԱՆ

http://www.echannel.am/?topic_id=656

Tags

Latest Month

August 2014
S M T W T F S
     12
3456789
10111213141516
17181920212223
24252627282930
31      
Powered by LiveJournal.com
Designed by Paulina Bozek